Shara barysynda QR Din isteri jáne azamattyq mınıstri, «Ýaqyp» qaıyrymdylyq qory Qamqorshylar keńesiniń tóraǵasy Nurlan Ermekbaev sóz sóıledi. Onyń aıtýynsha, Qazaqstanda ıgilikti, saýapty ister jasaýǵa nıetti adamdardyń qatary kóbeıip keledi.
«Din jolynda «saýapty is» jasaý úshin tek qana meshit salý mindetti emes. Qoǵam úshin paıdaly bolyp esepteletin kez-kelgen ıgilikti isti jasaýǵa bolady. Onyń ishinde mektepter, aýrýhanalar, jol salý, kópir salý sekildi qoǵamǵa paıdaly kez kelgen is saýapqa jatady..... Qordyń jumysy atalǵan máseleni sheshýge baǵyttalǵan. Ol qaıyrymdylyq jasaý jolyndaǵy isterdi tıimdi júıege salýǵa úles qosady. Eń bastysy – bári ashyq jáne qoǵam úshin paıdaly bolýy tıis», - dep atap ótti Nurlan Ermekbaev.
Qordyń qarajaty dinı ǵımarattar men áleýmettik nysandardy salýǵa, dinı qyzmetkerler men kedeılerge, jumyssyzdar men múgedekterge qoldaý kórsetýge arnalǵan jobalardy iske asyrýǵa baǵyttalǵan.
N. Ermekbaevtyń aıtýynsha, mundaı mekemeler qaıyrymdylyq jasaý dástúrleri qalyptasqan kóptegen elderde keń taralǵan. «Vakf» Instıtýty musylman elderiniń halyqtary arasynda keńinen qoldanylady, sondaı-aq arnaıy qurylǵan «Vakf» mınıstrlikteri de jumys isteıdi.
Atalǵan júıe qazirdiń ózinde Taıaý Shyǵystaǵy ıslam elderinde ǵana emes, sonymen qatar zaıyrly memleketterde de júzege asyrylýda. Mysaly, Reseı Federasııasynyń keıbir óńirlerinde, Qyrǵyzstan men Túrkııada bar.
Is-shara sońynda «Ýaqyp» Qory men «Al Sakr Fınans» AQ, «Astana Banki» AQ arasyndaǵy yntymaqtastyq týraly memorandýmdar bekitildi, budan bólek, mesenattar qaıyrymdylyq kómek kórsetýge ýaǵdalasty.
Esterińizge sala keteıik, «Ýaqyp» Qory bul dástúrli jáne adamgershilik qundylyqtardy qoldaýǵa baǵyttalǵan dinı radıkalızm men fanatızmdi boldyrmaýdy, áleýmettik jobalardy qarjylandyrýdy, bilim berý jáne tárbıelik qyzmetti qarjylandyrýǵa, dinı qyzmetkerlerdiń jumysynyń tıimdiligin arttyrýǵa jáne dinı ınstıtýttardyń qyzmetin qoldaýǵa baǵyttalǵan kommersııalyq emes qaıyrymdylyq uıym bolyp tabylady.
